ما سمعتش آخر خبر
بس علشان عارفه بتاع اشتغالات قولتله قديمة ... بيبو فرقع جيجي
قالي : يااااااااه ده انت قديم قوي .. يا ابني انت محتاج " أب ديت " علشان تواكب العصر
قلتله خلاص خلاص .. عرفت ... حمادة بيحب غادة .. وهي بتحب هاني
بصلي من فوق لتحت وقالي لأ ...
شكلك مش مثقف
- أنا ؟ و الله ابدا .. ده انا مو س قراية ... بس انا اللي مش بان عليا
- قالي انت شكلك مش من البلدي
قلتله ... لاااااااااااااا و ألف لاااااااااااا .. انا مصري و ابويا مصري ... و النيل جواه بيسري .. لولاش بس البلهرسيا اللي عملت فيا كده
قالي يا عم انت مش حاسس باللي بيحصل ف البلد
قلتله يا عم و الله حاسس ...
بس خايف اتكلم لاروح ف داهية ... البلد بتتباع ... و بتتنهب ... و بتتـ ...
حط ايده على بقى و كتم نفسي و قالي ... عندك
أناباتكلم عن حاجة تانية خالص ... ده انت نينه قوي
ايه يا عم قول ...
قالي : موبينيل باعت الشبكة القديمة بالقرد ... وجابت شبكة جديدة من غير قرد ..
- يا راااااجل ... من امتى الكلام ده ؟؟؟
- يا عم من فترة ... مش باقولك انت مش ف البلد
قلت اجرب الموضوع ده
طلعت الموبايل من درج النيش و مسحت التراب من عليه و ضربت
رقم واحد صاحبي
لقيت نفس الوية الغتته اللي مزهقاني ف عيشتي بتقولي نفس البق الحامص اياه
الرقم الذي طلبته غير متاح حاليا
وصاحبه ربما يكون معتقلا أو مسجونا
كررت المحاولة ... و الولية برضه ما بتزهقش ... نفس الجملتين
طب تاني يوم ... خطأ ف الإرسال
طب تالت يوم ... الشبكة مشغولة
طب رابع يوم
طب خامس
الله
امال فين الشبكة الجديدة ؟؟؟
هو بأمانة صوت الصفارة ساعت الرنين اتغيرت
لكن باقي البلاوي و حتى سرقة الرصيد
هي هي
ما اتغيرتش
انا بصراحة كنت شاكك ف القرد ان هو اللي بيسرق الرصيد
بس اهم باعوه ... و لسه الرصيد بيتسرق
يبقى العيب فييييييييييين ؟؟؟
المهم اني قعدت افكر
ف الشبكة الجديدة
و مميزاتها
و الجديد فيها
ما لقيتش غير حاجتين اتنين
انهم غيروا الصفارة
و باعو القرد اللي كان بيتكلم
و بكده يتفضلهم إنجاز واحد يا رب يقدروا يحققوه
انهم يبيعوا كمان قرد
بقاله أكتر من 25 سنة بيتكلم
بيتكلم وبس
اذا اعجبتك موضوعاتنا فاشترك في القائمة البريدية بالاعلى على اليسار ليصلك جديدنا يوميا
0 comments:
Post a Comment